Ukrayina prezidenti Volodımır Zelenskıy devam etken kütleviy darbeler sebebinden Rusiyege qarşı basqını quvetleştirmege çağırdı.
«Tek bütünley cezasızlıq duyğusı Rusiyege böyle ücümlerni yapmağa ve aynı vaqıtta olarnıñ kölemini daima arttırmağa imkân bere. Mında iç bir emiyetli arbiy mana yoq, amma emiyetli siyasiy mana bar. Böyleliknen, Putin basqıdan ziyade onen «dialogqa» küç sarf etken dünyanı ne qadar horlağanını köstere», – dep yazdı Zelenskıy mayısnıñ 26-nda Telegramda Rusiyeniñ daa bir darbesini izaatlap.
Onıñ aytqanına köre, Rusiyeni «er angi cinayetçini kibi» tek küçnen sıñırlamaq mümkün.
«Tek küç sayesinde – Birleşken Devletlerniñ küçü, Avropanıñ küçü, ayatnı ürmet etken bütün milletlerniñ küçü sayesinde – bu darbelerniñ bütünley toqtatıluvına ve kerçek barışıqqa irişmek mümkün. Artqan Rusiye darbelerine sanktsiyalarnı arttırıp cevap bermek kerek. Rusiyeniñ diplomatiyağa ürmetsizligini ve atta ateş toqtatmaqtan vazgeçkenini Rusiyeniñ maliyetini ve Rusiye cermay ticaretini qapatmaqnen qarşılamaq kerek. Men bütün dünyada böyle qaviy kün tertibini ileriletken er keske teşekkür bildirem. Rusiye bu cenkni bitirmek kerek. Ve bunıñ içün olarnıñ cenkleşmek istegini resurssız qaldırmaq kerek», – dep qayd etti o.
Zelenskıy qayd etkenine köre, mayısnıñ 26-na keçer gecesi Rusiye ordusı Ukrayina şeerlerine qarşı büyük cenk başlağanından berli eñ çoq sayıda dron qullandı, yaralanğanlar bar ve vatandaş infrastrukturası zarar kördi.
«Bu gece darbe coğrafiyası – Çerniğiv vilâyetinden Hmelnıtskıy vilâyetine qadar, Harkiv vilâyetinden Odesa vilâyetine qadar. Ve bu Rusiyeniñ kütleviy terrorınıñ üçünci gecesi edi – darbe dronları ve raketaları», – dep qoştı o.
Bugün Ukrayina Silâlı quvetleriniñ Ava küçleri gece Rusiye arbiyleri Ukrayinağa 355 uçucısız ve doquz qanatlı raketanen ücüm etti, dep bildirdi. Bütün rayetalarnı ve 288 uçucısıznı urıp tüşürgenler. Yerli akimiyet yaralanğanlar ve yıquvlar aqqında bildirgen edi.
Mayısnıñ 25-ne keçer gecesi Rusiyeniñ Ukrayinağa qarşı büyük darbesi neticesinde eñ az 13 kişi elâk oldı, onlarnen insan yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
