Kezlevde bir pensioner şeer skemlelerinde kimlerniñ yazğanı belli olmağan sözler sebebinden cinaiy maddege istinaden şübheli sayıla. Rusiyege qarşı sözlerniñ müellifini üç müessise qıdırdı. 65 yaşında yerli sakinni mahkeme etmege isteyler. Ne olğanını Qırım.Aqiqatnıñ maqalesinde tarif etemiz.
Keçenleri Kezlevniñ cemaat yerlerinde skemlelerde markerlerniñ yazılğan sözler peyda oldı. Bunı cenkke qoltutqan ve Rusiye mahsus hızmetlerine Ukrayina tarafdarı olğan ve cenkke qarşı çıqqan qırımlılarnı taqip etmege yardım etken Kefeli bloger Aleksandr Talipovnıñ «Krımskiy SMERŞ» Telegram kanalı bildirdi.
«Kezlevde bir qaç aftadan berli cemaat yerlerinde natsist şiarları peyda ola edi ve memleketniñ topraq bütünligini bozmağa çağıruvlar, Rusiye ordusını aqaretlev sözleri bar edi», – dep aytıla haberde.
Derc etilgen fotoresimde – ukrayin tilinde bir qaç ibare bar: «Yaşasın Ukrayina! Duşmanlar ölsin», «Afğanda sıçqaqladıñız, Ukrayinada da sıçqaqlarsıñız! Ğalebe bizim olacaq. Yaşasın Ukrayina», «İşğalciler, satqınlar, Ukrayinadan yoq oluñız!» ve ilâhre.
Rusiye ordusını aqaretlev ve «Rusiye topraq bütünligini bozuv çağıruvları» neden ibaret aytılmay. Qırımda bu malümat derc etilgen soñ sözlerniñ müellifi tutuldı, dep ilân etildi.
«Memleket reberliginiñ siyasiy yoluna qarşı sözler»
Rusiye uquq qoruyıcıları bu sözlerniñ müellifi tutuldı, dep ilân etti. Rusiye uquq qoruyıcıları 65 yaşında yerli sakinni qabaatladı.
Pensionerni tapıp tutmaq içün Rusiye İç işler nazirliginiñ Qırım bölügindeki Ekstremizm ile küreş merkezi ve Kezlevdeki Rusiye İç işler nazirligi bölüginiñ cinaiy qıdıruv hadimleri yerli FSB idaresiniñ yardımınen oğraştı.
«Kezlev polisine vatandaşlardan çoq daireli evler yanındaki raatlıq meydançıqlarındaki skemlelerde, em de park ve park alanında belli olmağan biri tarafından yapılğan, memleketniñ siyasiy yoluna qarşı malümatlar olğan yazılarnı tapqanları aqqında bir sıra haber keldi. Operativ-qıdıruv tedbirleri neticesinde hadimler vaqiağa 65 yaşında yerli sakinniñ alâqası bar olğanını ögrendi», – dep aytıla haberde.
Adı aytılmağan kişi qabaatını tanıdı, dep bildire uquq qoruyıcılar. Olar bir video derc etti, anda beti qapatılğan kişi «ordu ve Rusiye Federatsiyasını itibardan tüşürgen yazılar yazdı» ve «bir daa böyle hata ve bozuvlar tekrarlamaycaq», dep ayta.
Böyle video onıñ isteginen çıqarıldımı belli degil. Ukrayinağa qoltutqanı içün videoda afu soramağa mecbur etilgen er dördünji qırımlı «qoşma aşalavğa oğradı», dep bildire Irade Qırım aq qorçalayıcı teşebbüsi yerli propaganda saife ve medialarında derc etilgen yüz videonı tedqiq etken soñ.
«Ukrayinağa qoltutqan insanlarnı aşalav tedbirleri Qırımda kütleviy, muntazam ve çoqusı alda şablon usullarınen (videoda uquqiy alâmetleri olğan ve adiy nutuq içün tabiiy olmağan metin oquv) keçirile. Bunı Ukrayinağa qoltutqanını köstergen insanlarnı vazgeçtirmek ve vatandaşlarnı qorquzuv yolunen böyle areketlerniñ artmaması içün yapalar», – dep bildire tedqqat neticelerini ZMINA aq qorçalayıcıları.
Cinaiy sözler
Kezlevlige qarşı Rusiye Federatsiyası Ceza kodeksiniñ 214-ünci maddesiniñ 1-inci qısmına (vandallıq) istinaden cinayet alâmetlerine köre cinaiy dava açıldı ve «belli areketlerni yasaqlav şeklinde» sıñırlav tedbiri belgilendi, dep bildire Rusiye Federatsiyası İç işler nazirliginiñ Qırım bölügi.
Ne aqta aytıla bildirilmey.
Rusiye Federatsiyası Cinaiy protsessual kodeksine köre, belli areketler yasağında tış dünyanen bağlar, hususan, poçta-telegraf mesaclarınıñ alınması ve yollanması, bağ vastaları, şu cümleden internet qullanıluvı, areketler ya da açıq fikir bildirüvleri ola bile.
Böyle bir sıñırlav tedbiri daa yımşaq bir çare olmağanda belgilene.
Pensioner qabaatlanğan maddeniñ sanktsiyaları 45 biñ rublege qadar ya da mahkümniñ üç aylıq keliri miqdarında para cezası, 360 saatqa qadar mecburiy işler, bir yılğa qadar tüzetüv işleri ya da üç ayğa qadar apis cezasınıñ berilmesini belgiley.
«Ukrayinağa olğan sadıqlıqnı bastıruv siyaseti»
Rusiye Ukrayinağa qarşı büyük istilâsını başlatqan soñ Qırımda Ukrayinağa qoltutuv fikirleri faalleşti. Cenkke razı olmağan qırımlılar qarşı çıqa, şu sebepten de Rusiye uquq qoruyıcıları olarnı faal sürette taqip ete.
Ukrayinağa qoltutuv sebebinden taqip Rusiyeniñ 2014 senesinden berli yarımadada kerçekleştirgen «Ukrayinağa olğan sadıqlıqnı bastıruv siyasetiniñ» neticesi ola, dep bildire Ukrayina prezidentiniñ Qırım Muhtar Cumhuriyetindeki temsilciligi.
Qırım sakinleri milliy kimligini kösterüv, milliy timsallerni qullanuv ve Rusiye işğalini açıq tenqit etüv sebebinden taqip etile, dep bildire müessise.
Ne de olsa, qırımlılar «daimiy telükeniñ qıyın şaraitlerinde tirenüvini toqtatmay, aqlarını qoruy, işğal etilmegen topraqnen bağda qala, til, medeniyet ve vatandaş itibarını qoruy», dep bildire Temsilcilik.
Rusiye akimiyeti Qırımda siyasiy taqiplerni inkâr ete. Onıñ kontrolinde olğan Qırım akimiyeti yarımada sakinleri Rusiye prezidenti Vladimir Putinge ve Rusiyeniñ Ukrayinağa qarşı cenkine «bir kibi» qoltuta, dep israr ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
