Büyük Britaniya, Frenkistan, Almaniya ve ABD Ukrayinağa berilgen silâ sıñırlavlarını lâğu ettiler, dep haber etti Almaniya kantsleri Friedrich Merz WDR yayınında.
«Ukrayinağa berilgen silânıñ uzun mesafe sıñırlavları artıq yoq – ne ingliz, ne frenk, ne de bizim tarafımızdan. Amerikalılardan da yoq», – dedi o.
Onıñ aytqanına köre, Kyiv şimdi «Rusiyedeki arbiy obyektlerge ücüm etip, mudafaasını yapa bile». Merz Kyivge arbiy yardımnı arttırmağa, şu cümleden oña Olaf Scholz ükümeti tarafından blok etilgen Taurus uzun mesafeli qanatlı raketalarını bermege çoq çağırğan edi.
«Bunı [Ukrayinağa Taurus raketalarını bermege razı olur edim] yapar edim, dep er vaqıt ayta edim, amma tek avropalı ortaqlarımıznen beraber», – dedi o.
Merz bazı ğarbiy memleketler Ukrayinağa uzun mesafeli raketalar alıp kete, dep hatırlattı. O, Kyivge ATACMS raketalarını bergen ABD, Büyük Britaniya (Storm Shadow) ve Frenkistannı (SCALP) ayttı.
«İnglizler bunı yapa, frenkler yapa, amerikalılar bunı yapa», – dep qoşıp, o, silâ berilüvi FRG avropalı ortaqlarınen añlaşılsa, «Almaniya iştirak etmeli», dep qayd etti.
Bundan evel Ukrayinanıñ ittifaqdaşları kerginlik artar dep, Ukrayina Silâlı quvetlerine uzun mesafeli silâ bermekten qorqqan edi. The Washington Post yazğanına köre, ABD barışıq esnası içün telüke ola bileceginden ve Rusiye yolbaşçılığını «açuvlandıra» bileceginden qorqıp, Kyivge silâ yetkizüvini ilân etmedi. Gazetanıñ malümatına köre, ABD evelki idare kibi bedava yollamayıp, Patriot ava mudafaa sisteması içün Ukrayinağa cenk silâlarını satacaq.
Meselâ, Taurus raketalarınıñ mesafesi 500 kilometrge qadar yete. Ukrayinadan, işğal etilgen topraqlarda er angi noqtadan ğayrı, Rusiyeniñ Avropa regionlarınıñ büyük qısmı, hususan Moskva ücümge oğray bile. Meselâ, Ukrayina bıltır ğarbiy raketalarnen ücüm etken Qırım köprü de öyle.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
