Türkiye Tış işler naziri Hakan Fidan Moskvanı ziyaret etken soñ bu afta Kyivni ziyaret etip, Ukrayina memurlarınen körüşe bile, dep yaza Reuters Türkiye Tış işler nazirligindeki menbağa esaslanıp.
Fidan Moskvada eki künlik ziyaretinen buluna, menbanıñ malümatına köre, Rusiye prezidenti Vladimir Putinnen ve Rusiye tarafından esas muzakereci Vladimir Medinskiynen körüşti. Salı künü Türkiye naziri Rusiye zenaatdaşı Sergey Lavrovnen körüşecek.
Körüşüvde Putin ve Fidan «Ukrayina ve Rusiye arasında cenkni toqtatmaq içün soñki vaqıtları yapılğan teşebbüslerni, (ve) İstanbuldaki muzakerelerden soñ adise-vaqialarnı» muzakere etkenler, dep bildirdi Türkiyedeki menba.
Bazarertesi künü Rusiye muzakerelerniñ esas mevzusı eki taraflı munasebetler olacaq, Ukrayina da muzakere etilecek, dep bildirdi.
Rusiye ve Ukrayina arasında kelecek muzakerelerniñ vaqtı ve yeri daa belli olmasa da, Türkiye olarnı qabul etmege azır olğanını çoq aytqan edi.
Mayısnıñ 16-nda İstanbulda Ukrayina ve Rusiye arasında muzakereler keçirildi. Taraflar çoq añlaşamasa da, biñge biñ formatında esir deñişüvi aqqında añlaşma yapıldı. Deñişüvniñ soñki basamağı mayısnıñ 25-nde yekünlendi.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
