ABD prezidenti Donald Trump Rusiye prezidenti Vladimir Putinni kene sert bir şekilde tenqit etti.
«Vladimir Putin şunı añlamay, men olmasam, Rusiye artıq deşetli şeylerge oğrar edi. Ve men – KERÇEKTEN DEŞETLİ şeylerni aytam. Ateşnen oynay!», – dep yazdı salı künü Trump Truth Social içtimaiy ağında.
Mayısnıñ 26-nda da Donald Trump Trurh Socialda Putinni tenqit etti – Rusiyeniñ Ukrayinağa qarşı daa bir kütleviy darbesinden soñ. «Rusiye prezidenti Vladimir Putinnen munasebetlerim er vaqıt yahşı edi, amma oña bir şey oldı. Delirdi! Bir sebep olmağanda o qadar insannı öldüre, ve men tek askerlerni aytmayım. Ukrayinanıñ şeerlerine sebepsiz bir şekilde raketa ve uçucısızlarnen ura», – dep yazğan edi Trump.
Kreml bazarertesi künü Trumpnıñ sert sözlerini «er kesniñ duyğuları çoq olğanınen» añlattı. ABD prezidentiniñ Ukrayinadaki vaziyetni çezüv yanaşuvını Putinniñ matbuat kâtibi Dmitriy Peskov «balanslı» dep adlandırdı.
Wall Street Journal gazetası menbalarına esaslanıp, Trump bu afta Rusiyege qarşı sanktsiyalarnı kirsetme imkânını baqa, dep haber etti. Yañı sanktsiyalarnıñ maqsadı – Putinni uzlaşuvğa mecbur etmek, hususan ABD prezidenti talap etkeni kibi, 30 künlik ateşkeske razı ettirmek. WSJ menbasınıñ malümatına köre, Rusiyege qarşı yañı sanktsiyalarnen bağlı qarar daa alınmadı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
