Rusiye akimiyeti mayısnıñ 30-na Rusiye arbiyleriniñ Or Qapı rayonında talimleri olacaq, dep ilân etti. Rusiye kontrolindeki rayon yolbaşçısı Sergey Bidanetsniñ içtimaiy ağlardaki saifelerinde bildirgenine köre, talimler saat 9:00-dan 16:00-ğa qadar olacaq.
«Ateş sesleri eşitile bile. Aytılğan saatta Or Qapı şeeri-Mırza Qoyaş (Krasnoarmeyskoye) köyü tarafında cemaat naqliyatınıñ areketi sıñırlanacaq. Ciddiy ihtiyac olmasa, şahsiy naqliyatnen çıqmamağa rica etem», – dep yazdı Bidanets.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa baqqanda büyük artış bar: 2023 senesi 40 talim, 2022 senesi 20 talim, 2021 senesi 44 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
