Rusiye yaqında olacaq barışıq añlaşması boyunca memorandumnıñ leyhası üzerinde çalışmağa devam ete, dep bildirdi Rusiye Tış işler nazirliginiñ vekili Mariya Zaharova.
«Rusiye yaqınlaşqan barışıq añlaşması aqqında memorandumnıñ leyhasını azırlamağa devam ete, anda bir sıra madde belgilene, meselâ, çezüv temelleri, ola bilecek barışıq añlaşmasınıñ müddeti, eger uyğun añlaşmalar yapılsa, ola bilecek muvaqqat ateşkes», – dedi o, brifingde.
Onıñ aytqanına köre, Moskva Ukrayina tarafı «aynı işni yapıp, azırlağanlarını Rusiye vesiqasını alıp yollaycaq».
Ukrayina prezidentiniñ ofis yolbaşçısı Andriy Yermak bildirgenine köre, Rusiye vaqıt sozmağa, bir şeyler azırlamağa ve ateşni toqtamamağa devam ete.
«Öldürüvler içün mesüliyetten qaçınmaq içün adiy vaqıt sozuluvı, em de sert sanktsiyalardan qaçınuv ıntıluvları. Bizge bu ebediy beklevni toqtatmaq kerek – Rusiye daa çoq sanktsiya almaq kerek», – dep yazdı o, Telegramda.
Mayısnıñ 23-nde Rusiye Tış işler naziri Sergey Lavrov Moskva esir deñişüvi bitken soñ cenkni toqtatuv aqqında añlaşmağa kelmek şartları olğan vesiqa leyhasını Kyivge bermege azır olğanını bildirgen edi. Deñişüvniñ soñki basamağı mayısnıñ 25-nde yekünlendi.
Ukrayina Tış işler nazirligi Ukrayina Rusiyeden şartsız barışıq añlaşmasınıñ tam tekliflerini bekley ve cevap azırlay, dep bildirgen edi.
Ukrayina prezidenti Volodımır Zelenskıy «Ukrayina netice ketirecek er angi muzakere formatına azır», amma «Rusiye kerçekleşemegen şartlarnı qoysa ve ola bilecek neticelerni bozsa, sert aqibetleri olmalı», dep aytqan edi.
Şimdilik Rusiye ciddiy bir uzlaşuv içün azır olğanına dair bir alâmet köstermedi. Amma tam tersini sıñ-sıq kösterip, Ukrayina qabul etmegen şartlarını tekrarlap turdı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
