Mayısnıñ 25-nde Minusinskte Rusiye apishanesinden azat etiplgen «qırımlı musulmanlar davasınıñ» soqur iştirakçisi Aleksandr Sizikov tuvğanlarınen körüşti ve Qırımğa evge qayta. Bu aqta «Qırım birdemligi» haber ete.
Soçi ava limanında onı anası ve advokat Edem Semedlâyev qarşıladılar.
«Sizikov evge kete, Qırımğa, bir qaç yıl devam etken taqipten soñ, Minusinsk Rusiye apishanesine etaptan ve apisten soñ. Sağlıq vaziyeti sebebinden azat etildi – maşina qazasından soñ kör oldı – tutulmazdan ve apiske alınmazdan evel», – dep aytıla haberde.
Sizikovnıñ apiste bulunmasına mania olğan hastalıqlar cedvelinde olğan soqurlığı bar. Amma 2023 senesi mayıs ayında onı 17 yılğa azatlıqtan marum ettiler, ilk dört yılını o, apishanede keçirecek edi. Rusiyeniñ İstinaf arbiy mahkemesi 2024 senesi sentâbrniñ 13-nde ükümni deñişmesiz qaldırdı.
Aleksandr Sizikov «Hizb ut-Tahrir» davasınıñ mabüsi oldı – bu teşkilât Rusiyede terror teşkilâtı olaraq tanılıp yasaqalanğan edi, amma diger memleketlerniñ çoqusında serbest faaliyet köstere.
2020 senesi oraq ayınıñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
I derece saqatı Sizikov başta ev apsinde edi. Lâkin 2024 senesi sentâbr ayında onı evden alğanlar ve dekabr ayında Aqmescit SİZOsından Minusinsk apishanesine etap etkenler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
